Познато колку долго ќе отсуствува малерозниот Арда

Карло Анчелоти се обиде да го охрабри Арда Ѓулер по третата повреда која ја заработи Турчинот како член на Реал Мадрид, но италијанскиот стручњак истовремено беше искрен и призна дека талентираниот фудбалер е депримиран по најновиот шок кој го доживеал.

Набрзо по пристигнувањето во „кралскиот клуб“, Арда мораше да ја прекине турнејата и да направи операција на коленото, а оваа потешка повреда повлече уште две мускулни повреди, од која најновата ќе го оддалечи од терените извесно време.

Доброинформираните „Марка“ и „АС“ обелоденија дека Арда скинал мускулно влакно на квадрицепсот и тоа е најновата повреда која го оддалечува од терените, а која истовремено прави неговото деби да биде одложено по трет пат.

Талентираниот Арда веќе надмина една мускулна повреда и беше дел од тимот на последните два меча, но остана неискористена резерва и многумина останаа разочарани од таквиот епилог.

На крајот испадна дека Ѓулер заработил повреда на загревањето пред мечот со Брага во Лигата на шампионите, а лекарските прогнози се дека ќе мора да направи пауза во период од еден месец.