Позната италијанска мафија му се заканувала и изнудила пари од Гатузо

Џенаро Гатузо успеа да го стабилизира Марсеј и ситуацијата изгледа далеку подобро на „Велодром“, но Италијанецот во последно време се соочил и со многу проблеми во приватниот живот.

Како што известува италијанскиот медиум „Il Fatto Quotidiano“, популарниот Рино се соочил со закани и уцени од познатата мафија „Ндрангета“, која важи за најозлголасена во регионот во Калабија, а која на нелегален начин се обидела да изврши притисок врз семејството на познатиот фудбалер, а сегашен стручњак.

Познатиот медиум информира дека сестрата и таткото на Гатузо биле уценувани за да остапат имот кој сакал да го користи мафијата, па Рино морал да се вмеша во целата ситуација и да бара решение на легален начин.

Во целата ситуација која траела неколку месеци, мафијата запалила два автомобила на сестрата на Џенаро со цел да го заплаши целото семејство, а откако полицијата привела двајца од сторителите, било откриено дека било барано изнуда и во висина од 80 илјади евра.

Познатиот Џенаро искористил свои конекции за да го намали притисокот и платил симболичен дел од споменатата сума за да се смират криминалците, кои според „Il Fatto Quotidiano“ од тренерот на Марсеј добиле од 3 илјади до 10 илјади евра.

Рино засега не сака да одговара на прашањата на оваа тема и повиците кои ги има од познатите италијански новинари, но јасно е дека полицијата се уште го истражува случајот и максимално соработува со Франческо и Ида Гатузо, таткото и сестрата на Џенаро.