Познат клуб му нуди спас на Нејмар: 60 проценти се шансите да заврши кај нас

Нејмар се пресели во Ал Хилал како голема фудбалска ѕвезда и требаше да биде лидер на проектот, но саудискиот супер-тим покажа дека знае да освојува титули и без најголемата ѕвезда.

Бразилецот заработи тешка повреда на коленото и се врати на терените пред две недели, а во ситуација кога сите очекуваа полека да почне да ги оправдува вложените средства, Нејмар заработи нова повреда.

Ал Хилал соопшти дека Нејмар поради повреда на задната ложа ќе паузира околу шест недели, па ова сценарио полека буди и нервоза кај Саудијците, кои веќе не планираат да му го продолжат договорот на напаѓачот.

Договорот на популарниот Неј истекува на крајот на оваа сезона, а како што стојат работите во моментов, најзагреани за негов ангажман се водечките луѓе на неговиот матичен клуб, Сантош.

– Немаме отпочнато официјални преговори со Нејмар во моментов, но неговото враќање во клубот е сон за секој наш навивач. Односот со Нејмар ни е извонреден. Тој ја почна својата кариера тука и враќањето во Сантош зависи од неговата желба и од развојот на ситуацијата во Ал Хилал. Според мене, 60 проценти се шансите дека Нејмар ќе заврши кај нас откако ќе му истече договорот со Ал Хилал. Мислам дека ќе се согласи да си ја намали платата, тој го сака Сантош, а исто така сака да биде дел и од Светското првенство во 2026-та година, – вели Марсио Калвеш, извршниот директор на Сантош.