Познат е наследникот на Саутгејт на селекторската позиција во Англија

Герет Саутгејт одлучи да ја заврши приказната со англиската фудбалска репрезентација по Европското првенство на кое „трите лава“ го освоија второто место, поточно на втор турнир во низа од оваа категорија ја освоија вицешампионската позиција.

Англичаните се внимателни со изборот на нов селектор и не сакаат да брзаат, па поради тоа се решија за привремено решение, стратег кој ќе ги води на стартот на Лигата на нации во септември, но и на есен ако не се затвори ова прашање.

Нов предводник ќе биде Ли Карсли, човекот кој ја води младата селекција до 21 година, човек кој лани им донесе титула на младите англиски фудбалери на ЕП до 21 година, прво славје по 1984 година.

Карсли има работено и во англиската репрезентација до 20 години, но и во Ковентри, Брентфорд и Бирмингем.

Како активен фудбалер беше репрезентативец на Ирска, на клупско ниво најзначајниот ангажман го имаше во Евертон.