Пожарот ја проголтал куќата на тренерот Редик, НБА го одложи дуелот Лејкерс-Шарлот

Страшниот пожар во Лос Анџелес досега уништи многу куќи и објекти и со својот интензитет предизвика голема паника меѓу жителите, а имуни на катастрофата не останаа ниту големите спортски имиња.

Медиумите веќе пренесоа дека дел од холивудската елита остана без своите луксузни вили во Калифорнија, но тоа се случило и со домот на тренерот на Лос Анџелес Лејкерс, Џеј Џеј Редик.

„ЕСПН“ пренесе дека куќата на предводникот на НБА екипата денеска целосно изгорела, со што Редик и неговото семејство се нови жртви на вонредната ситуација. Редик и неговите најблиски беа евакуирани од областа каде живееја уште пред неколку дена, а денеска стигнала уште една лоша вест за тренерот на Лејкерс.

Речиси истовремено, поради огнената стихија, НБА донесе одлука да го одложи натпреварот меѓу Лејкерс и Шарлот.

Во своето соопштение, НБА испрати поддршка и благодарност за пожарникарите и волонтерите кои се борат со огнот низ Ел-Еј, а засега не е јасно кога двете екипи ќе го одиграат овој одложен натпревар.