Португалскиот суд ја одбил жалбата, Леао треба да му плати голема сума на Спортинг

Рафаел Леао ќе треба да му исплати 16,5 милиони евра на својот поранешен клуб Спортинг Лисабон, пресудил португалскиот суд.

Леао беше член на Спортинг во 2018 година, кога незадоволни навивачи влегоа во тренинг центарот на екипата, по што фудбалерот реши експресно да се пресели во Лил.

Подоцна, Леао направи трансфер во Милан, но Спортинг одамна започна судски процес, со кој бараше да добие отштета, затоа што постоела активна откупна клаузула во периодот кога тој заминал во Франција.

Спортскиот арбитражен суд во Лозана пресуди во корист на Спортинг, а португалскиот апелациски суд денеска ја потврдил одлуката, дефинирајќи ја отштетата на 16,5 милиони евра.

Фудбалерот на Милан може да се жали и до Врховниот суд, но мали се шансите дека ќе може да се извлече без да ја плати високата сума која треба да заврши на контото на лисабонскиот клуб.