Португалскиот селектор ослободил четири ѕвезди пред гостувањето во Хрватска

Хрватската фудбалска репрезентација мора да оди на позитивен резултат против Португалија за да го потврди пласманот во четвртфиналето на Лигата на нации и да не зависи од другите селекции, а гостите потврдија дека ќе пристигнат во Сплит без неколку ѕвезди.

По вчерашната убедлива победа над Полска и обезбеденото прво место во групата, португалскиот селектор Роберто Мартинез ослободил четворица важни играчи предводени од Кристијано Роналдо.

Роналдо, но и Бернардо Силва, Педро Нето и Бруно Фернандеш добиле зелено светло да го напуштат националниот тим, односно да добијат некој ден одмор пред да им се вратат на клупските обврски.

Фабио Силва и Џеовани Куенда се дополнително повикани од Мартинез и тие ќе бидат во комбинација за гостувањето во понеделник, исто како и Тиаго Џало, за кого немаше место во официјалниот состав од 23 играчи за дуелот со Полска.

;