Поранешен капитен на Наполи: Се изненадив што претседателот го договори Конте

Наполи денеска му гостува на Јувентус во една од дерби средбите кои се закажани за викендов, а фановите со нетрпение го очекуваат соочувањето на поранешните шампиони, кои сезонава имаат и нови тренери на своите клупи.

Лоренцо Инсиње како поранешен капитен на Наполи јасно е определен во однос на поддршката на денешното соочување во Торино, а за италијанските медиуми открил дека е позитивно изненаден од пристигнувањето на Конте во Неапол.

– Не верував дека Де Лаурентис може да направи ваков потег и да убеди толку важен тренер како Конте.

– Сигурно и енергијата и страста на фановите имале свое влијание, Конте веројатно ја почувствувал и атмосферата во сезоната во која беше освоена титулата.  Како фан на Наполи, среќен сум што тој ја води екипата сезонава, – рекол Инсиње, кој долго настапуваше за Наполи, но не успеа да освои скудето со оваа екипа.

– Секогаш ќе бидам фан на Наполи и посакувам да имав освоено скудето, но за жал, фудбалот е таков. Истото важи и за играчи како Кулибали, Хамшик, Мертенс, Алан… сите заслуживме такво нешто, но на крајот среќен сум што клубот подоцна стигна до титулата,  – истакнал актуелниот играч на Торонто.