Пол позиција за Норис на Монца, Ферстапен и Ред Бул во деликатна ситуација

На стартот на сезоната никој не можеше да предвиди дека Макс Ферстапен и Ред Бул ќе добијат сериозна конкуренција во текот на годината, но како што се ближи клучниот дел од возбудувањата, се повеќе може да се заклучи дека Мекларен е тимот кој во моментов е најдобар во Формула 1.

Ландо Норис и Оскар Пјастри го потврдија тоа и ова попладне во квалификациите на трката за Големата награда на Италија, на која утре Норис ќе има огромна шанса да направи посериозен рез и да ја намали позитивата на Макс Ферстапен.

Причина за тоа е катастрофалната сабота за светскиот шампион и неговиот тим Ред Бул, бидејќи покрај Норис и Пјастри, побрзи од него беа уште четири возачи.

Ферстапен со крајни напори се избори само за седмо стартно место утре на Монца, па тоа во ваков распоред на силите ќе биде сериозен дефицит на трката.

Покрај двоецот на Мекларен кој ќе стартува прв, Ферстапен е и зад Расел, Леклер, Саинц и Хамилтон, па може слободно да се каже дека ќе има пеколно тешка задача да се избори и за подиум.

Зад него денеска заврши Чеко Перез, што доволно говори дека Ред Бул е во сериозни проблеми и во се поделикатна ситуација.

Ако продолжи овој тренд, Ред Бул повеќе од сигурно ќе ја загуби конструкторската титула, а веќе во прашање се доведува и титулата на Ферстапен која изгледаше прилично сигурна пред неколку трки.