Пол позиција за Норис, катастрофа за Ферари во квалификациите за трката во Сингапур

Ландо Норис извозе најбрз круг во квалификациите за Формула 1 трката во Сингапур и утре ќе стартува од пол позицијата која досега не му носеше среќа во однос на конечниот пласман.

Пилотот на Мекларен стигна до шестата пол позиција во кариерата, но досега не се снаоѓаше најдобро на стартовите, серија која утре ќе се обиде да ја прекине во уште еден дуел со Макс Ферстапен.

Актуелниот светски шампион ќе стартува втор, односно од првиот ред и веднаш зад Норис, додека вториот ред го пополнија возачите на Мерцедес, Луис Хамилтон и Џорџ Расел.

Последната квалификациска сесија донесе големо разочарување за Ферари, откако најпрвин Саинц заврши во оградата и предизвика прекин со црвено знаме, а подоцна на Леклер му беше избришано времето, па двоецот на Скудерија ќе стартува од деветтата и десеттата позиција.

Меѓу Расел и црвените болиди се најдоа Пјастри, Хулкенберг, Алонсо и Цунода.