Покетино му одговори на Саутгејт за случајот „Џејмс“: Одлуката не е донесена од фудбалерот

Рис Џејмс е голем потенцијал на Челси, но и на англиската репрезентација, а фудбалерот во моментов е на пат да се врати во препознатлива форма по последната принудна пауза поради повреда.

Менаџерот Маурисио Покетино ги „дозира“ неговите настапи во договор со лекарскиот тим, а Џејмс му соопштил и на селекторот Герет Саутгејт дека не може да се стави на располагање за дуелите со Малта и Македонија.

Ова донесе и една сериозна изјава од Саутгејт, кој индиректно му се закани на Џејмс дека со ваквото однесување ризикува да остане без место во националниот тим на претстојното ЕП во Германија.

Во целиот вербален конфликт се вклучи и Покетино, кој испрати порака до англискиот селектор, обидувајќи се да го намали товарот на Џејмс за донесената одлука.

– Во вакви случаи, фудбалерот никогаш не ги носи одлуките сам. Лекарскиот тим и стручниот штаб ја носат последната одлука, а не фудбалерот.

– Ова не беше одлука на Рис, тој е очаен да игра за националниот тим, но клубот и репрезентацијата заеднички треба да ја донесат најдобрата одлука, – изјавил Покетино.