Победнички старт на Милано на клупата на Вардар

Аргентинскиот стратег Гиљермо Милано со победа ја започна приказната со македонскиот ракометен прволигаш Вардар кој славеше на гостувањето кај Струга со 34:25 во рамките на 11. коло во Суперлигата.

Скопскиот тим одигра колку што му беше доволно на овој меч за да дојде до посакуваниот резултат, десетто славје во шампионатот. Домаќините беа рамноправни во првиот дел и на пауза заминаа само со еден гол негатива (16:15).

Меѓутоа второто полувреме беше друга приказна, фаворитот одигра на повисоко ниво на двете страни на теренот, поцврсто, поефикасно и беше запишан триумф од девет разлика. Од овој меч за издвојување е и тоа што кај гостите конечно дебитираше засилувањето Мигел Пинто, додека по повредата се врати и бекот Димитро Горига.

Сега за Вардар следи европски предизвик, гостување кај Валур во Европската лига на ЕХФ.