Платини предложи револуционерна промена во фудбалот: Луѓето од мојата генерација веќе не гледаат натпревари

Мишел Платини важи за еден од најдобрите играчи на сите времиња, но фудбалските фанови го паметат и по неговиот престол во УЕФА кој на крајот не заврши баш на добар начин поради скандалот со корупција.

Легендарниот Французин беше прв човек на УЕФА речиси 10 години и на неславен начин го заврши својот мандат, но иако сега е дистанциран од фудбалот во последната деценија, Платини реши да се активира со еден револуционерен предлог.

Во период кога играчите постојано се жалат за новите натпреварувања кои ги смислуваат ФИФА и УЕФА, Платини смета дека е време за поголема промена во фудбалската игра во поглед на бројот на играчи на теренот.

– Можеби најдобро решение за фудбалот би било ако се повлече по еден фудбалер од секој тим. Мислам дека ќе се гледа подобар фудбал со 10 играчи на теренот. Тимовите броеја 11 играчи и во мое време, но тогаш се трчаше многу помалку, играчите не беа толку силни и се играше побавен фудбал.

– Луѓето од мојата генерација веќе не гледаат фудбал бидејќи не ја препознаваат оваа игра. Денеска има повеќе додавања наназад, отколку напред. Не сакам да критикувам, но луѓето од мојата генерација беа навикнати да гледаат напаѓачки фудбал, затоа ова денеска не им се допаѓа. Има многу тактизирање и непотребен посед на топка, – вели Платини.