Пирес: Знам дека Мбапе е разочаран, но Перез е газда во Реал!

Франција со победата на Египет од 3:1 се пласираше во големото финале на Олимписките игри и ќе се бори за златниот медал, натпревар во кој за противник ќе ја има силната Шпанија.

„Триколорите“ го одбранија домашниот терен и продолжија да сонуваат за најсјајното одличје, а иако францускиот тим предводен од Тјери Анри е исполнет со неколку млади ѕвезди кои се надалеку познати во Европа, јасно е дека тимот ќе беше уште посилен со Килијан Мбапе.

Момчето кое израсна во Бонди имаше огромна желба да биде дел од олимпискиот тим и да игра на игрите во родната земја, но уште пред да направи трансфер во Реал Мадрид, доби јасни сигнали дека нема да добие таква дозвола.

За Флорентино Перез несфатливо е да се играат два големи турнири во исто лето, па остана цврсто на својот став и не му дозволи на големото засилување да се приклучи на олимпискиот тим.

Робер Пирес како легенда на Франција се стави во кожа на својот сонародник за кого вели дека сигурно е разочаран, но истовремено ја сфаќа и одлуката на Перез кој мисли само за доброто на Реал.

– Знам дека Мбапе е разочаран, знам дека сакаше да игра на Олимписките игри. Секое дете сонува за Олимписки игри, а сега беше уште помоќно пооради тоа што се игра во Франција и во неговиот Париз. Тој ги познава сите играчи во тимот, но тој што одлучува е Реал. Флорентино Перез е газда во Реал и мислам дека мора да се почитува зборот на претседателот. Јас лично сакав да го гледам како игра за тимот на Анри, но во Реал имаат поинаков став. За Флорентино, Мбапе е многу поважен за Реал, отколку за францускиот олимписки тим, – вели Пирес кој беше дел од Олимписките игри во 1996-та година.