Пикси: Влаховиќ има шанса да покаже дека тоа што му го прават во Јуве не е фер

Драган Стојковиќ денеска одржа прес-конференција во Белград и оттаму испрати пораки за поддршка до цел македонски народ, ставајќи ја во преден план големата трагедија во Кочани која го погоди цел регион.

Српскиот селектор покажа класа и најави дека ќе закаже пријателски меч со Македонија за да се соберат парични средства за семејствата на настраданите во ужасниот пожар, па по емотивната увертира која ја имаше при обраќањето, во продолжение се насочи на спортски теми кои се интересни за домашните медиуми.

Србија во месец март ќе одигра два натпревари против Австрија во Лигата на нации, а пред истите, Пикси најави дека има максимална доверба во Душан Влаховиќ, фудбалер кој минува низ навистина тежок период во Јувентус.

– Имам навистина високо мислење за Влаховиќ и за неговите квалитети. За жал, во фудбалот понекогаш може да има навистина негативна атмосфера во еден клуб. Нема да навлегувам во детали и да коментирам зошто не игра во Јувентус, тоа е нивна работа.

– Јас можам да зборувам за себе, за нас, за Србија. Секој играч има позитивни и негативни периоди во кариерата, но ние го цениме Душан и сметаме дека е еден од најважните играчи во тимот. Тој секогаш ќе игра додека јас сум селектор, сега има шанса да покаже дека тоа што му го прават во Јувентус не е фер, – изјави Пикси.