Пикси доби жесток напад од Србија: Како да немавме селектор, никогаш не сум видел вакво нешто

Раде Богдановиќ во својата играчка кариера настапуваше за екипи како Атлетико Мадрид, Вердер Бремен и Арминија Билефелд, а како поранешен југословенски репрезентативец денеска се најде во фокусот со својата осуда за Драган Стојковиќ.

Поранешниот фудбалер кој за Светското првенство работи како стручен аналитичар ја префрли цела вина кај селекторот Пикси, откако Србија се распадна по водството од 3:1 и испуши чиста победа против Камерун.

Ремито од 3:3 многумина го гледаат како пораз, бидејќи тимот кој беше подобар на теренот дозволи набрзина да прими два смешни и речиси идентични гола во ситуација кога се местеше офсајд замка.

– Никогаш не сум видел некој толку лошо да води еден натпревар како тоа што денеска го правеше Стојковиќ. Како да немавме селектор на клупата. Водевме два гола разлика и имавме висок пресинг, наместо да ја спуштиме топката и да чекаме со момци кои не се доволно подготвени. Откако се повреди Павловиќ, настана потоп во тимот.

– Не ми е јасно што имаше Пикси во главата. Во вториот дел ни недостасуваше тактика и цврста рака. На 3:1 дозволивме да ни направат контра, јас никогаш не сум видел вакво нешто во животот, – вели Богдановиќ.