Пике даде револуционерен предлог за фудбалот во шоуто со Касилјас: Мора да промениме нешто

Првиот поткаст организиран од Икер Касилјас вчера беше ексклузивно емитуван во Шпанија, а истиот привлече огромно внимание бидејќи прв гостин му беше Жерард Пике.

Легендите на Реал Мадрид и Барселона во голем дел од разговорот се задржаа на „Ел Класико“ случувањата од минатото, но отвори и други разноразни теми, од кои посебно во фокусот се најде онаа за популаризирање на најважната споредна работа во светот.

Фудбалот доживува надолен тренд и новите генерации се поретко се одлучуваат да гледаат фудбалски натпревари, а според Пике, тоа е така бидејќи се уште има средби кои завршуваат 0:0.

За да се избегне најнепопуларниот резултат во иднина, Жерард има и предлог до водечките луѓе на фудбалот, односно им препорача да се промени едно правило.

– Не може да отидеш на фудбалски стадион, да потрошиш 100, 200 или 300 евра за билет, а натпреварот да заврши 0:0. Мора да се промени нешто на таа тема. Имам еден предлог кој можеби звучи смешно, но би донел резултат. Ако натпреварот заврши 0:0, двата тима да добијат по 0 бодови. Ако се активира такво нешто, натпреварите целосно ќе се отворат од 70-та минута и нема да гледаме натпревари што завршуваат 0:0, – вели Пике.