Пети: Играчите на Јунајтед се кријат зад Тен Хаг…

Манчестер Јунајтед се мачи на почетокот на оваа сезона иако може да се каже дека работите мрднаа од мртва точка по репрезентативната пауза ако се земе предвид дека екипата забележа победи над Саутемптон и Барнсли, две победи во кои даде десет, а не прими ниту еден гол.

Секако тоа се два клуба кои се далеку под нивото на „црвените ѓаволи“ и останува да се види како тимот ќе се снајде овој викен на гостувањето кај Кристал Палас во Лондон, место на кое во минатата сезона доживеа вистински дебакл од 4-0.

Не треба многу за да се вратат жестоките критики на адреса на менаџерот Ерик Тен Хаг, но според Емануел Пети некои од нив се неосновани, претерани затоа што играчите мора да преземат одговорност и да не се кријат зад стратегот.

-Не се согласувам со сите критики околу Ерик тен Хаг. Јас всушност ги гледам играчите таму и мислам дека се кријат зад него.Не ми се допаѓа. Тоа се играчи со вистинско педигре и се кријат зад него наместо да се кренат и да работат за тимот, -порача Пети кој се надева дека Јунајтед ќе се крене за доброто за англискиот фудбал, Премиер лигата.

-Многу е тешко за еден клуб кога продолжуваат да менуваат менаџери колку што тоа го прави Манчестер Јунајтед. Штета е да се види клубот во сегашната состојба. Премиерлигата има потреба од Манчестер Јунајтед да се врати во своите најдобри моменти и се започнува со играчите.

-Да, менаџерот е одговорен за многу работи, а исто така и управниот одбор за да се среди тоа на трансфер пазарот, но на крајот на денот тоа е одговорност на играчите на теренот и тие веќе некое време не се доволно добри, -подвлезез Французинот.