„Петарди“ на Англија и Норвешка, хет-трик на Халанд за промоција во Лига А (Видео)

Англија и Норвешка во иднина ќе бидат дел од Сегментот А во Лигата на нации, откако двете селекции запишаа убедливи победи на последните натпревари во групната фаза.

„Гордиот Албион“ се загреваше 45 минути против Ирска и мрежите мируваа на „Вембли“, но потоа следеше фудбалска голеада, која посебно беше иницирана од црвениот картон на Скејлс.

Англија доби и пенал во дадената ситуација и истиот прецизно го реализираше Кејн, по што следеше вистински потоп за гостите до крајот на мечот. Домаќините постигнаа уште четири гола преку Гордон, Галахер, Боуен и Харвуд-Белис, убедлива победа која беше доволна за прво место во групата и промоција во Лигата А.

Таму ќе ја гледаме и Норвешка, која оваа вечер доби и голема помош од Словенија, која со голот во завршницата ја шокираше Австрија и ја испрати на второто место во групата.

Ремито од 1:1 одеше во прилог на Норвежаните, кои денеска беа преубедливи и постигнаа пет гола во мрежата на Казахстан. Ерлинг Халанд постигна три гола, еден Серлот, а конечните 5:0 ги постави Нуса.