Периќ и Граџан едногласни пред Магдебург: Нема да се предадеме, ќе одиграме најдобро што можеме

Составот на Еурофарм Пелистер е пред нов сериозен тест, реваншот против Магдебург во осминафиналето на Лигата на Европа.

Битолчани загубија на првата средба со 32-24 за да потоа претрпат пораз и од Вардар во големото дерби во домашниот шампионат, па затоа сега четата на Бабиќ е дополнително мотивирана и желна да покаже дека може многу подобро, односно дека може да се носи рамноправно и со тимови со поголемо реноме.

-Очигледно е дека падот на формата дојде во најлошо можно време. Треба да се собереме и да одиграме најдобро што можеме против Магдебург во Германија. Мораме тој натпревар да го искористиме за да извлечеме поуки и да смениме што не функционираше во нашата игра и да се вратиме на прав пат, бидејќи ни следат уште многу важни натпревари во краток период, -вели Јосип Периќ.

Сличен став како Периќ има и Елмир Граџан.

-Магдебург е екипа за која не треба да се трошат зборови. Покажаа дека се една многу квалитетна екипа. И ние сезонава покажавме дека можеме секому да парираме. На последните два натпревари малку паднавме, но верувам дека во Магдебург ќе го покажеме вистинското лице. Без разлика на заостанувањето од Битола, нема да се предадеме. Се подготвуваме и сигурно ќе бидеме незгоден противник за нив, -порача кружниот напаѓач.

Дуелот Магдебург-Пелистер се игра утре од 18:45 часот.