Перез заслужено најдобар во Саудиска Арабија, Ферстапен се погрижи за еден-два триумф на Ред Бул

Макс Ферстапен поради проблем со погонската единица остана без шанси да се бори за висока позиција на вчерашните квалификации, а тоа навистина многу влијаеше на денешната трка во Саудиска Арабија, која мина во знакот на двата возачи на Ред Бул.

Чекор Перез на почетокот беше престигнат од Фернандо Алонсо кој неправилно стартуваше, но брзо успеа да се рехабилитира и ја врати првата позиција, која потоа не ја испушти до крајот. За разлика од него, Макс стартуваше дури 15-ти и во првите неколку круга беше доста резервиран, но откако ги загреа гумите, почна да ги прелетува болидите пред себе.

На половина од трката, Ферстапен стигна до четвртата позиција, а потоа на патеката влезе безбедносно возило, кое дополнително му ги олесни работите на светскиот првак.

Ферстапен имаше среќа и без проблеми ги мина Расел и Алонсо, но сепак немаше доволно брзина да го стигне и престигне својот тимски колега, кој по триумфот во квалификациите, денеска беше најдобар и на трката во Џеда.

Фантастичниот болид на Астон Мартин повторно му донесе одлична трка на Фернандо Алонсо кој повторно се најде на подиумот како третопласиран, а зад него се најдоа двајцата возачи на Мерцедес, Расел и Хамилтон. Во топ 10 се пласираа уште Саинц, Леклер, Окон, Гасли и Магнусен.