Пелистер останува перфектен и по дербито со МЗТ Скопје

Пелистер ја продолжи перфектната серија во македонското кошаркарско првенство, победувајќи го во дербито големиот ривал МЗТ Скопје со 88:85.

Битолскиот прволигаш ја забележа осмата победа во неизвесна завршница која беше и очекувана во дуелот на две квалитетни екипи, а влегоа со подеднакви амбиции за освојување на бодовите.

МЗТ го доби првиот период со 29:25, возвратија домаќините за само минус еден на полувреме, а Пелистер го потврди својот квалитет во третиот период во кој стигна и до плус 12, за да влезе во завршните десет минути со предност од седум поени.

На половина период, Пелистер водеше со 85:72, по што следуваше фантастична серија на МЗТ кој успеа да дојде до 85:85 на 55 секунди до крајот. Калахан реализираше два поена за предност на домаќините, а по промашувањето на МЗТ, следуваа слободни фрлања за Малешевиќ, кој реализираше едно, постигнувајќи ги конечните 88:85.

Кесар со 27 и Малешевиќ со 22 поени беа најефикасни во победничката екипа која има учинок осум од осум, додека кај МЗТ, Олуџоби постигна дури 38 поени, но не беше прецизен во нападот во кој МЗТ бркаше израмнување во финишот.

За разлика од Пелистер, МЗТ досега одигра шест натпревари и има три победи и три порази.