Пелистер одигра брилијатна последна четвртина и запиша трета победа во АБА2

Пелистер ја запиша третата победа во четвртата рунда во АБА2 лигата, прва по воведниот турнир во ова натпреварување во кое славеа над ТФТ и Шенќур.

Осијек важеше за сериозен предизвик уште пред почетокот на мечот и тоа се исполни на теренот, но македонскиот тим успеа да покаже квалитет во одлучувачките моменти и направи пресудна разлика во четвртата четвртина.

Пелистер влезе со негатива од три поени во последниот период, но во последните 10 минути одигра брутално добра кошарка и го принуди противникот да избрзува и да шутира од неизградени позиции.

Битолчани славеа во овој период со 23:8 и сосема заслужено стигнаа до нови бодови во АБА2 лигата, во која сега се на шестото место на табелата.

Сеад Хаџифејзовиќ со 20 поени беше најдобар во редовите на Пелистер, одличен беше и Димитар Караџовски со 17 поени, а одличен на двете страни беше и Недим Мустафица со дабл-дабл од 14 поени и 10 скокови.