Пелистер го упропасти извонредниот старт со една лоша четвртина и претрпе пораз од Војводина

Пелистер го претрпе вториот пораз во новата сезона во АБА2 лигата, а за овој навистина има зошто да се жали, особено поради неверојатниот старт на мечот кој го имаше нашиот претставник.

Битолчани беа извонредни во првите 10 минути и брзо се стекнаа со двоцифрена предност (20:7), но добриот старт за жал не беше доволен за победа над српскиот ривал Војводина.

Пелистер одржуваше предност и во втората четвртина и на полувреме замина со предност од 37:34, меѓутоа потоа следеше огромен пад во третиот период, кој всушност го одреди победникот на денешниот меч.

Војводина ги доби овие десет минути со 26:11 и го сврте мечот во своја полза, што беше дефинитивен удар за битолскиот тим и покрај желбата за враќање во завршницата.

Пелистер го доби последниот период со 16:14, но тоа беше доволно само за ублажување на поразот (74:64).