Пелистер броеше до „100“ во големата полуфинална победа над ТФТ

МЗТ Скопје и Работнички вчера означи старт на полуфиналните возбудувања во македонскиот плејоф, а вечерва програмата продолжи со второто полуфинале меѓу Пелистер и ТФТ.

Според проценките, оваа битка требаше да донесе изедначена и неизвесна кошарка, но наместо тоа, видовме доминација на играчите во „зелено“ кои многу полесно од очекуваното стигнаа до убедлива победа.

Пелистер испорача „стотка“ и победи со 100:80 на домашен терен во „Боро Чурлевски“, триумф кој беше најавен уште во воведот од мечот кога на семафорот стоеше 12:0, а потоа 19:2.

Составот од Скопје успеа да се разбуди на стартот на вториот дел и во еден момент успеа да стигне и до прифатливи 66:60, но потоа следеше нова серија на Пелистер, со која резултатот пред крајот на последните 10 минути гласеше 83:68.

Во последната четвртина, Пелистер рутински ја доработи задачата и поведе со 1:0, па сега е чекор поблиску до големото финале во најсилната кошаркарска лига во Македонија.

Сеад Хаџифејзовиќ со 32 поени и 12 скока беше убедливо најдобар играч на паркетот и најзаслужен за победата на Пелистер, додека на спротивната страна се истакна Александар Костоски со 19 поени.