Пауновиќ: Јовиќ мора да најде ментор во Реал

Лука Јовиќ минатото лето за сума од околу 60 милиони евра направи бомбастичен трансфер од Ајнтрахт Франкфурт во големиот шпански гигант Реал Мадрид, но напаѓачот воопшто не се снајде во досегашниот престој на „Сантијаго Берабеу“.

Од него се очекуваше да биде добра поткрепа, замена за Карим Бензема, меѓутоа во таа мисија не успеа, немаше влијание во играта, понекогаш беше и комплетно изоставуван од составот за да сега по карантинот се врати со повреда во Реал и најверојатно оваа сезона за него е завршена.

-Сите се надевавме дека ќе видиме повеќе од Јовиќ и мислам имаше доволно време за адаптација. Ама се уште верувам во него, -истакна Вељко Пауновиќ кој долго години беше дел од шпанскиот фудбал.

Поранешниот член на Атлетико Мадрид смета дека Јовиќ треба да најде постар колега во Реал кој ќе му биде вистински ментор и ќе му помогне во надминување на предизвиците.

-Зидан добро се грижи за него. Ама мислам му фали ветеран за да му покаже како големите клубови како Реал, Атлетико и Барселона функционираат. Јовиќ мора да си го заврши својот дел и да најде некој кој ќе му биде ментор. Барањата во Реал се големи и мораш да бидеш подготвен за нив, -порача Пауновиќ.