Партизан рутински ја отвори серијата со Цедевита, „црно-белите“ со една нога во АБА финалето

Црвена Звезда го декласираше Будуќност и лесно се пласираше во финалето во АБА лигата, а по тој пат сега тргна и Партизан кој денеска немаше проблеми против Цедевито Олимпија.

Откако доби сериозна опомена од Студентски Центар во четвртфиналето, Партизан далеку поенергично и помотивирано ја стартуваше полуфиналната серија, па така денеска поведе со 1:0.

„Црно-белите“ добија добри инструкции од Жељко Обрадови и уште во првата четвртина јасно ставија до знаење дека ќе ги диктираат случувањата на теренот, па на полувреме се замина со резултат 42:26.

Сигурната предност продолжи и во третата четвртина и веќе беше решено прашањето околу победникот, па тоа му овозможи на Обрадовиќ да ги одмори најдобрите и да им даде шанса на резервите.

Партизан лесно ја одржа двоцифрената предност и на крајот победи со 85:70, па сега серијата се сели во Љубљана каде во вторник ќе се игра вториот меч.