Партизан повторно потклекна во финишиот, Димитријевиќ и Милано си заминаа со победа од Белград

Партизан повторно загуби на натпревар на кој сериозно беше во игра да победи, па тоа полека се претвора како огромен проблем за реновираниот тим кој го предводи Жељко Обрадовиќ.

Шестиот пораз во низа прави Партизан да биде еден од најлошите тимови во Евролигата, а од големиот пад на српскиот великан, овојпат профитираа Ненад Димитријевиќ и неговите соиграчи.

Партизан едноставно застана при предност од 76:75 и откако претходно диктираше во сите три четвртини, факт кој полека укажува на тоа дека овој тим на Обрадовиќ има проблеми и на психолошки план во завршницата од натпреварите.

Играчите на Олимпија Милано беа поприбрани во клучните моменти и на крајот со победа од 81:88 си заминаа од Белград, што за нив е четврти триумф во Евролигата.

Нено не се изнаигра против својот омилен тим и доби девет минути во кои забележа три поени, па за него ова беше еден од поскромните натпревари во Евролигата.

Во редовите на Милано, посебно се истакна Миротиќ со 17 поени, следен беше од Ледеј и Менион со 13 поени, додека во Партизан најефикасни се Браун и Дејвис со 17 поени.