Партизан му даде 40 поени на Реал во една четвртина, но и тоа се покажа како недоволно за победа

Партизан постигна 40 поени во првата четвртина во шпанската престолнина и дефинитивно го изненади фаворизираниот Реал Мадрид, но во следните две постигна само 34 и тоа беше пресудно за поразот кој го претрпе.

Момците на Жељко Обрадовиќ покажаа дека можат да се носат со поквалитетни противници, но и натаму преовладува голема нервоза во клучните моменти кога се крши мечот и тоа знаеше како да го искористи тим како Реал.

„Кралевите“ успеаја да дојдат до водство уште до крајот на првото полувреме, а добрата серија ја продолжија и во третиот период во кој славеа со 32:23.

Тоа им овозможи комотна предност од плус 12, на стартот на последната четвртина стигнаа и до максимални плус 15, па до крајот само го одржуваа водството.

На крајот, Реал запиша нова победа со резултат 105:97, а Партизан може да жали што не ја повтори играта од првата четвртина, особено во офанзивен план.

На останатите средби во Евролигата, Црвена Звезда минимално славеше над Макаби со 69:68, Олимпијакос беше подобар од Алба 86:76, додека Фенербахче ја оствари единствената победа на гостински терен кај Милано (72:82).