Партизан го „скрши мразот“ и победи во Евролигата по пауза од осум години

По трите стартни порази и лошиот впечаток во најсилното можно друштво, Партизан вечерва имаше ноќ за паметење во Белград и стигна до првата победа во Евролигата по пауза од осум години.

Српскиот кошаркарски великан предводен од Жељко Обрадовиќ конечно се израдува на евролигашки триумф и буквално ја декласираше Виртус Болоња, по што многумина веруваат дека се скршен мразот и работите треба да бидат доста полесни во иднина.

Партизан одигра извонредно од почеток до крај и победи со преубедливи 90:62 против италијанскиот тим, кој со овој пораз сега падна зад српскиот претставник на табелата.

Преполната сала и извонредната атмосфера беа добра увертира за прва победа во елитното друштво после долго време, а тоа најпозитивно влијаеше кај Нанали, Анџушиќ и Лесор кои беа лидери во победничкото славје.

Од останатите средби во Евролигата, за издвојување е инфаркт завршницата во Каунас, каде Жалгирис успеа да слави над Барселона со 73:72.