Партизан доби уште една „мајсторка“ и закажа АБА финале со Звезда

Партизан вторпат во низа мораше да игра „мајсторка“ во нокаут фазата во АБА лигата, но на крајот ја оствари целта и се пласираше во големото финале, во кое Црвена Звезда се чекираше уште пред две недели.

„Црно-белите“ се изнамачија против Студентски центар во претходната фаза, но мораа да играат трет натпревар и против Цедевита Олимпија во полуфиналето, во кое како клучно се покажа предноста од домашен терен.

Партизан немаше проблеми во преполната сала на домашен терен и убедливо го совлада ривалот со 90:71, доминирајќи и диктирајќи го темпото во сите четири четвртини.

Тимот на Жељко Обрадовиќ беше предводен на теренот од Ледеј кој постигна 17 поени, а следен беше од Нанали кои уфрли 12 поени. Во поразениот тим, Драгиќ беше најефикасен со 15 поени.

Во големото финале, силите ќе ги одмерат вечните ривали, но засега се уште не се познати термините на одигрување на натпреварите, бидејќи Црвена Звезда најави бојкот ако не се одредат разумни дати за одигрување.