Париз остана без половина екипа, Евролигата го одложи дуелот со Фенербахче

Натпреварот од кошаркарската Евролига меѓу Париз и Фенербахче нема да се одигра денеска и ќе биде презакажан за во друг термин.

Голем број играчи на францускиот клуб се жртви на одреден вирус или труење и не се во состојба да настапат денеска, поради што клубот побарал и добил реакција од Евролигата.

– Се работи за некој вирус или труење од храна, не знам за што се работи. Дури и јас не се чувствував добро деновиве, – изјавил тренерот Тиаго Сплитер.

Според официјалните правила, секоја екипа мора да има барем осум подготвени играч за настап за натпреварот да биде одигран, а Париз докажал дека се соочува со сериозен проблем и голема бројка на повредени и заболени кошаркари.

Французите ќе мора да му ги покријат трошоците на Фенербахче за патувањето и престојот во француската престолнина, а дополнително ќе биде утврден термин за одигрување на средбата.