Пандев остана на клупа и гледаше како Џенова доживува срам во Фиренца (Видео)

Џенова ќе има тешка мисија да опстане во Серија А оваа сезона, бидејќи и заминувањето на Андриј Шевченко не предизвика позитивен шок врз тимот.

Напротив, Џенова вечерва изгледаше уште помизерно и полошо на теренот, а нашиот Горан Пандев го проследи тоа од клупата за резерви бидејќи не доби шанса за игра.

Фиорентина се наслади од маките на гостите од „Луиџи Ферарис“ и немаше милост кон гостинскиот голман Сиригу, кој вечерва дури шест пати ја вадеше топката од својата мрежа, а можеше и повеќе.

Влаховиќ не реализираше пенал при резултат 0:0, но по неговата утка, следеа голови на Одриозола, Бонавентура и Бираги за сигурно и комотно водство од 3:0 на полувреме.

Во вториот дел, Србинот се поправи и постигна одличен лоб погодок за 4:0, а покрај Влаховиќ, во вториот дел втор погодок постигна Бираги, а конечните 6:0 ги постави Тореира во 77-та минута.

Џенова е претпоследна на табелата со само 12 освоени бода и има шест помалку од првиот тим кој е во сигурната зона, додека Фиорентина се искачи на шестото место со денешната победа.