Пандев избран за делегат во ФФМ од страна на ОФС Струмица

Горан Пандев во последното интеврју за италијанските медиуми најави дека во месец јуни и официјално ќе стави крај на играчката кариера, но ако се суди според последните случувања, искусниот напаѓач веќе има планови за тоа што ќе прави во блиска иднина.

Популарниот Гоче има клуб во Првата македонската фудбалска лига во Академија Пандев, но од денеска е и делегат во ФФМ откако му беше доверена оваа улога од страна на ОФС Струмица.

Општинскиот фудбалски сојуз во Струмица на денешното собрание го избрал Пандев за прв делегат и со тоа Гоче ќе има свое место во Собранието на ФФМ, што всушност е прв официјален чекор како фудбалски работник, надвор од професионалната кариера.

Покрај Пандев, меѓу трите делегати од струмичкиот сојуз се најдоа и Ѓорги Гоцевски како претседател и Ванчо Коцев како трет делегат, по што стана јасно дека ова фудбалско тело од Струмица планира да се вклучи во работата на Фудбалската Федерација, нешто што не го правеше во изминатите 12 месеци.

Поранешниот капитен на македонската фудбалска репрезентација добил поддршка од 38 членови на денешното Собрание, во кое тој се вклучил преку видео врска на интернет.