Панчев: Звезда не треба да се срами, Реал прими четири голови од оваа Барса!

Црвена Звезда се обиде да парира против Барселона и навистина добро го правеше тоа во првиот дел, па покрај тоа што постигна гол, еден беше и поништен поради минимален офајд.

Сепак, голот на Роберт Левандовски за 1:2 пред крајот на првиот дел беше најава за распад во домашниот тим во продолжение, па така Барса постигна три брзи гола и на крајот рутински славеше со 2:5.

Новиот пораз на Звезда во Лигата на шампионите јасно алудира на големата и тешката конкуренција во Европа, а легендарниот Дарко Панчев во интервју за „Спорт Клуб“ нагласи дека никој во клубот не треба да се срами од високиот пораз од лидерот во шпанското првенство.

– Ги повторуваме грешките од коло во коло во Европа, големиот пад во концентрацијата прави разлика на вакво ниво. Не знам дали е недостаток на физичка подготовка, тренерот Владан Милојевиќ треба да зборува за тоа и да даде објаснување. Но, ако се биде реален, постои огромна разлика во квалитет, ги одмеривме силите со тим кој според мене го игра најубавиот фудбал во Европа. Барселона е екстра класа, имаат феноменална техника, ја држат топката, проигруваат цело време. Имаат многу мајстори во тимот и може само да им се честита.

– Имаше и моменти кога судијата беше малку пристрасен кон гостите, а тоа го користат големите клубови. Ова не е ништо ново за мене, вечната поделба на Исток и Запад во Европа, многупати сум го доживеал тоа. Сепак, овојпат тоа не беше пресудно за резултатот. Победи подобриот тим, значително подобриот ривал на теренот. Факт е дека Звезда функционираше добро 45 минути, парираше и се бореше, организираше неколку добри акции и играше пресинг. Постигна гол, за малку ќе видевме уште еден. Беше активна и изгледаше добро, но потоа следеше голем пад во концентрацијата. Истото беше и против Интер и Монако, таму лежи сериозен проблем иако противниците се навистина силни.

– Поразот боли, но не сум разочаран. Барселона е голема фудбалска сила, од вакви тимови се учи и не е срамота да се загуби со три гола разлика од нив. Реал Мадрид на домашен терен прими четири гола од оваа Барса. Одиме понатаму, да се обидеме да освоиме некој бод во преостанатите натпревари во Лигата на шампиони и да не се навраќаме на ждребот кој не ни донесе среќа. Можевме да поминеме многу подобро на ждребот, но таква ни е судбината, – вели Панчев во разговорот за „Спорт Клуб“ и за крај додава.

– Едно големо БРАВО за атмосферата, кореографијата и навивањето. Европа виде се, уште еднаш големо БРАВО! Белград и Србија со право имаат претставник во најелитното европско натпреварување, – завршува Дарко.