Палмер собори рекорд на Челси стар над две децении, па доби честитки од досегашниот рекордер

Челси вчера имаше водство, но дозволи пресврт на дуелот со градскиот ривал Фулам и му овозможи на Ливерпул да ја зголеми предноста на врвот на премиерлигашката табела.

Мала утеха за стрелецот на единствениот гол, Кол Палмер, е фактот што со реализацијата во мрежата на Бернд Лено стигна до еден важен клупски рекорд.

За англискиот репрезентативец ова бил 26. гол годинава, со што успеа да постави нов рекорд за бројот на постигнати голови во една календарска година.

Досегашниот рекорд беше 25 погодоци во реализација на Џими Флојд Хазелбенк во далечната 2001 година, а поранешниот холандски фудбалер уште по средбата го коментирал овој момент.

– Момчето го заслужи ова. Рекордот стоеше долго време, сега е минато, но не постоеше подобра опција од тоа Палмер да го собори, – рекол Хазелбенк.