Паје направи трансфер откако ја одби Саудиска Арабија: Го избрав фудбалот пред парите!

Димитри Паје не по своја волја ја заврши етапата во Марсеј и со солзи во очите се прости од својот сакан клуб, по што беше јасно дека ќе направи премин во друг клуб како слободен агент.

Поради педигрето и фудбалската класа која ја поседува, популарниот Дими е доста атрактивен на трансфер пазарот и на 36-годишна возраст, а иако во изминатиот период доби милионски понуди од Саудиска Арабија, на крајот се сели во Бразил.

Паје ја прифти понудата од Васко де Гама и ќе игра во еден од најголемите клубови во Јужна Америка, но пред да се упати кон Бразил, направил кратко интервју за „Радио Монте Карло“ пред да полета од Франција.

Довчерашниот капитен на Марсеј не пропушти шанса да ги поздрави големиот број европски ѕвезди кои ги избраа парите пред убавината на фудбалот, па со својата изјава брзо стана вирален хит.

– Луѓето кои ме знаат се добро упатени во тоа дека мене парите никогаш не ми биле приоритет. Се вратив во Марсеј поради љубов, а истото е и со најновиот избор кој го направив. Го избрав фудбалот пред парите.

– Барав нешто што ќе биде емотивно за мене како Марсеј, а сметам дека фудбалот никаде не се доживува поемотивно од Бразил и Васко де Гама. Пресреќен сум од мојот избор, – вели Паје.