Орсато призна дека направил грешка што не го исклучил Пјаниќ

Италијанскиот судија Даниеле Орсато гостувал во телевизиско шоу, во кое отворено зборувал за професијата, но и за конкретни ситуации од неговата кариера.

Орсато ја поздравил политиката на новиот претседател на италијанската судиска асоцијација, Давиде Тренталанџе, кој најави почесто гостување на судиите во медиумите и поголема комуникација со клубовите и фановите.

– Сите правиме грешки и ги признаваме, можеме да се подобриме само ако научиме нешто од нив.

– ВАР технологијата ни помага, на пример на дуелот меѓу Специја и Парма имаше офсајд за кој беше невозможно да биде забележан од мојот помошник. Има простор за промени, но само во позитивна насока, – изјавил Орсато.

Искусниот судија признал дека погрешил на дуелот меѓу Интер и Јувентус пред неколку години, кога не му додели втор жолт картон на Миралем Пјаниќ.

– Тоа беше грешка, бев блиску, но не го забележав она што се гледа од повторените снимки. Јас видов вообичаен воздушен дуел, а немаше простор за реакција на ВАР според протоколот, – објаснил Орсато.