Омерагиќ за иднината на Милевски во националниот тим: Нема да влечам нефудбалски потези

Масар Омерагиќ беше официјално избран за нов претседател на Фудбалската Федерација на Македонија и веќе го оформи својот поблизок круг на соработници, но за време на првите обраќање кои ги имаше како нов мандатар, даде одговор и на прашањето кое доста кружеше во фудбалските кулоари во последно време.

Првиот човек на македонскиот фудбал најави дека ќе следат големи промени и реформи во младинските категории, но кога е во прашање најсилната репрезентација, навести дека засега нема да се влечат радикални потези, односно работата на актуелниот селектор е сигурна.

Благоја Милевски има важечки договор и уживаше огромна доверба од Муамед Сејдини, па иако се појавија шпекулации за негова смена со новата гарнитура во Федерацијата, Омерагиќ изречно нагласи дека нема да влече нефудбалски потези.

– Во овој момент не се размислува за смена. За волја на вистината, ние бевме први во групата во Лигата на нации и не планирам да влечам нефудбалски потези.

– Факт е дека имаше одредена криза во играта и резултатите, но сега сме први во групата и веќе во март ги започнуваме квалификациите за настап на Светско првенство. Едноставно е за сите работници во фудбалот. Како за мене, така и за селекторите, резултатите ќе ја одредат судбината. Милевски моментално е селектор на А репрезентацијата и во тој поглед не планирам никакви промени. Нормално, во иднина се ќе зависи од резултатите и од игрите на репрезентативците, – порача Омерагиќ.