Омерагиќ по митингот во Сараево: Делиме слични предизвици со Федерациите од регионот

Масар Омерагиќ и генералниот секретар Дрилон Ганиу беа дел од вчерашниот регионален митинг на фудбалските Федерации кој се одржа во Сараево, а по остварената средба со претседателите од соседството, заклучокот е дека речиси сите се соочуваат со исти предизвици.

Омерагиќ како нов претседател на македонската фудбалска Федерација ги изнесе впечатоците од вчерашната средба во Босна и Херцеговина, на која имаше можност да се сретне и со првиот човек на УЕФА, Александар Чеферин.

– Со федерациите од регионот делиме слични предизвици и затоа нашето учество на регионалните состаноци е значајно. Исто така, секогаш е корисно да споделиме искуства, да разговараме и бараме решенија за одредени прашања.

– Заедно со колегите од регионот дискутиравме за различни прашања кои се однесуваат на Националните првенства, споделување податоци околу стратешките цели и финансиски анализи, потоа предизвици околу судењето итн.

– Особено нѐ радува поддршката која ја имаме од УЕФА и претседателот Александар Чеферин. Следниот состанок ќе го имаме на Конгресот на УЕФА во Белград и остануваме посветени на целите кои ќе донесат напредок за македонскиот фудбал, – изјави Омерагиќ.