Омерагиќ избран за претседател на ФФМ: Новиот лидер најави голем новитет во мак-фудбалот

Македонската Фудбалска Федерација го доби својот седми претседател во својата историја, а тоа од денеска и официјално е Масар Омерагиќ.

Како единствен кандидат на денешното Вонредно Собрание кое се одржа во хотелот „Хилтон“ во Скопје, Омерагиќ беше едногласно избран и доби акламација од сите присутни делегати, па така и дефинитивно стана човекот кој отсега ќе заседава во најважното фудбалско тело во нашата земја.

При своето обраќање како наследник на Муамед Сејдини, Омерагиќ нагласи дека вратата ќе биде ширум отворена за секој оној кој сака да му помогне на македонскиот фудбал, а притоа апострофираше дека во неговиот тим ќе преовладуваат чесноста, транспарентноста и чистиот образ.

– Приоритет ќе ни биде реконструкција на работата во младинските категории. Не го искористивме пласманот на Европско првенство како што треба и не добивме наплив на нови играчи. Стагнираме во младинските категории, имаме лоши резултати и планираме да направиме реформа која во две години треба да донесе резултати.

– Младинските категории треба да бидат расадник за играчи во У21 репрезентацијата, а потоа оттаму да се црпи најдоброто за А селекцијата, – изјави Омерагиќ кој соопшти и голем новитет во мак-фудбалот, односно имплементација на ВАР системот во Првата лига од сезоната 2025/26.