Олмо конечно дочека деби за Барса и веднаш направи голема разлика: Со нетрпение го чекав ова

Повредата на Андреас Кристенсен и овозможи на Барселона да ја искористи „сивата зона“ во шпанскиот фудаблски законик и со тоа да го регистрира Дани Олмо навреме за мечот со Рајо Валјекано, нешто што се покажа како клучно за победа на каталонскиот гигант.

Големото летно засилување влезе на стартот на вториот дел и направи пресудна разлика на теренот, бидејќи неговиот гол беше вреден за пресврт и победа на „Валјекас“.

Олмо брзо покажа дека ќе биде огромен плус во тимот на Ханси Флик поради начинот на кој се нудеше и ја бараше топката на секој дел од теренот, а судбината посака да постигне гол за првиот тим на Барселона десет години по заминувањето од Ла Масија во Динамо Загреб.

– Се чувствував многу добро, имав голема желба за игра и бев фит за натпреварот. Конечно дочекав да заиграм за Барселона, навистина сум пресреќен што дебитирав и што му помогнав на тимот.

– Откако пристигнав тука, со нетрпение го чекав првиот натпревар и го дочекав тоа. Дебито не можеше да биде подобро за мене, – изјави Олмо.