Окон заврши во оградата, ќе ги пропушти квалификациите во Мајами

Формула 1 возачите викендов првпат се среќаваат со новата патека во Мајами, а дел од нив завршија и во заштитната ограда, прекинувајќи ги досегашните слободни тренинзи.

Последен во низата беше Естебан Окон, а поради последиците од контактот со оградата, возачот на Алпин ќе ги пропушти квалификациите.

Окон нема да може да се бори за подобра стартна позиција на утрешната трка на американското гран-при бидејќи неговиот тим не може навреме да го подготви болидот за квалификациите.

– Можеме да потврдиме дека за жал, Естебан нема да биде дел од квалификациите.

– Неговата шасија е уништена од ударот и не може навреме да биде заменета. Естебан се чувствува добро и ќе вози на утрешната трка, – вели Алпин во официјалното соопштение.