Охрид се пофали со четири супер-засилувања за новата сезона (Фото)

ГРК Охрид досега ги донесе Берин Бркиќ и Теимураз Орјоникидзе, но денеска се пофали со четири нови имиња кои се и тоа како добро познати за македонската ракометна јавност.

Популарните „гладијатори“ ќе имаат сосема нов изглед во новата натпреварувачка сезона и најавуваат дека ќе имаат навистина повисоки амбиции, а доказ за тоа се ангажманите на голманот Даниел Ѓорѓески, крилото Гоце Ојлески, бекот Никола Стоилевски и дефанзивецот Милорад Кукоски.

– Среќен сум што се враќам назад во Македонија и посебна чест ми е што ќе бидам дел од ваков одличен проект и тим како што е Охрид. Охрид е сериозна екипа со големи амбиции, а јас се надевам дека оваа сезона ќе ги исполниме сите цели и сите заедно ќе се радуваме на многу победи, – изјави Ѓорѓески кој доаѓа од редовитен а унгарски Будакалас, а претходно имаше настапувано за Металург, Вардар и Пелистер.

– Драго ми е што ќе сум дел од ракометниот клуб Охрид, клуб кој што покажува сериозност и квалитет во македонскиот ракомет. Се надевам следната сезона ќе ни биде успешна и ќе славиме многу победи, – изјави репрезентативното крило Ојлески кое доаѓа крај езерото откако ја заврши етапата со Еурофарм Пелистер.

– Драго ми е што ќе бидам дел од екипа која има одлични планови и цели за во иднина кои би ми помогнале многу да напредувам како играч, – кратко изјави младиот 24-годишен Стоилевски кој досега настапуваше за вториот тим на Пелистер.

– Мило ми е што доаѓам во клуб со европски амбиции, кој расте од година во година. Сигурен сум дека ќе ги оправдаме очекувањата на управата и публиката, – изјави искусниот Кукоски кој со своите 35 години и натаму важи за еден од најдобрите дефанзивци во лигата.