Официјално: Симеоне доби нова „деветка“ за 38 милиони евра (Фото)

Атлетико Мадрид беше принуден да реагира на трансфер пазарот откако Алваро Мората реши да ја напушти шпанската престолнина за да се пресели во Милан, па иако прва опција на „душекџиите“ беше Артем Довбик, на крајот Диего Симеоне сигурно ќе се задоволи и со втората опција која вечерва беше официјализирана.

Чоло не успеа да го добие најдобриот стрелец во Ла Лига од минатата сезона, но затоа го доби вториот голгетер во „Пичичи“ трката, а тоа е Норвежанецот Александер Серлот кој денеска стави потопис на четиригодишен договор.

Корпулентниот напаѓач имаше импресивни изданија за Вилјареал и веднаш стана атрактивен за финансиски помоќни клубови, па на крајот испадна дека Атлетико е оној кој реши да ги исполни барањата на „жолтата подморница“.

Серлот пристигнува како човек кој ќе треба да го пополни празното место кое го остави Мората, а 23-те гола кои ги постигна минатата сезона сигурно се добар предуслов за да биде лидер во нападот на Симеоне.

Како што јавуваат угледните шпански медиуми, Атлетикоо на крајот успеал да издејствува и мал попуст од Вилјареал, односно ќе плати фиксни 32 милиони евра, како и дополнителни 6 во вид на бонуси.

🇳🇴 ¡Alexander Sørloth ya es rojiblanco! ❤️🤍 pic.twitter.com/AoohkcWV7J

— Atlético de Madrid (@Atleti) August 3, 2024