Обвинителството во Аргентина сподели нови докази: Личниот доктор на Марадона му го фалсификувал потписот (Фото)

Речиси два месеци по неговата смрт, Диего Армандо Марадона и натаму е многу актуелен за обвинителството во Аргентина, бидејќи условите во кои починаа отворија многу сомнежи, а воедно и истрага од која дел се и многу негови блиску луѓе со кои секојдневно комуницираше.

Еден од најпогодените во целиот овој неочекуван расплет е неговиот личен доктор Леополдо Луке, кој сега и официјално е обвинет за една тешка проневера, или поточно, фалсификување на потпис за да добие документи до кои немал пристап.

Обвинителството во Сан Исидро го води целиот случај со легендарната „10-ка“ на Аргентина и денеска оттаму пристигна информација дека се потврдиле нивните сомнежи, односно докторот Луке го фалсификувал потписот на Марадона за да ја добие неговата целосна лекарска историја на 1-ви септември 2020-та година, неколку месеци пред неговата смрт.

– Трите документи кои беа најдени, откриваат нешто очигледно, а тоа е многу валкано. Само потврдивме дека се работи за тоа во што се сомневавме, фалсификација на потписот на Марадона, – гласи соопштението на обвинителството.

Леополдо Луке е еден од луѓето кои сериозно се гонат за небрежно делување и извршување на својата лекарска дејност во последните денови од животот на Марадона, а како ќе заврши цел овој скандал за познатиот неврохирург кој му ја направи и последната операција на Марадона, ќе покаже само времето.