„Ножичките“ на Санабрија го неутрализираа расположениот Кварацхелија (Видео)

Наполи немаше посакувана увертира за реванш осминафиналето против Барселона во Лигата на шампионите, бидејќи вечерва на домашен терен не успеа да победи еден од најлошите тимови во Италија во последно време.

Торино пристигна на „Диего Марадона“ со јасна идеја да се брани и да ги фрустрира домаќините, а на крајот успеа во тоа дури и во ситуација кога бркаше резултат.

Наполи долго се мачеше и се обидуваше на секаков начин да го скрши отпорот на гостите од Торино, но кога тоа го направи извонредниот Квича Кварацхелија, предноста брзо беше испуштена.

Грузиецот беше убедливо најдобар играч на теренот и заслужено постигна гол, но радоста малку траеше, бидејќи Торино при една мешаница успеа да израмни само три минути подоцна.

Санабрија израмни во 64-та минута на сензационален начин со „ножички“, па иако Квича имаше уште неколку добри обиди за втор гол, на крајот резултатот не се менуваше и мечот заврши 1:1.