Ново големо изненадување на ЕП: Начевски и Николов ја делеа правдата во ракометниот распад на Франција

Пласманот на Франција во полуфиналето на Европското првенство од денеска и не е така сигурен, откако „триколорите“ добија ракометна лекција од селекцијата на Исланд.

„Рибарите“ приредија огромно изненадување на континенталниот турнир и во ситуација кога немаа осум важни ракометари поради коронавирусот, што прави оваа победа над Франција да биде уште послатка и со поголема тежина.

Исланѓаните презентираа страшна игра во двата правци и неизвесно беше само до 4:4 во првото полувреме, по што почна неверојатната серија на аутсајдерите на хартија. Исланд замина со плус седум на полувреме и тоа беше добра најава за сензацијата, која подоцна беше само реализирана во вторите 30 минути.

Французите беа немоќни да се вратат во игра и во ниту еден момент не дојдоа блиску и до попристојна негатива, па на крајот го претрпеа првиот пораз на шампинатот со 29:21.

Македонските судии Начевски и Николов ја делеа правдата на оваа средба, на која посебно блескаше Магнусон со десет погодоци, исто како и Кристијансон кој имаше девет реализации.