Новиот стопер на Наполи: Моја инспирација е Рамос, не размислувам да се вратам во Реал

Реал Мадрид заработи околу 12 милиони евра од играч кој никогаш не доби шанса во првиот тим на Карло Анчелоти, па така денеска Рафа Марин беше и официјално претставен како играч на Наполи.

Иако трансферот беше официјализиран уште пред неколку недели, за официјалната промоција се чекаше до денеска, а тоа му овозможи на младиот шпански стопер првпат да се обрати како нов член на „наполитанците“.

– Со пристигнувањето во Италија си го остварив сонот. Секогаш замислував како играм воо Серија А. Ова беше голема можност за мене и не можев никако да ја испуштам, – изјави Рафа Марин, кој не сака да размислува за опцијата за откуп која ја задржа Реал Мадрид.

– Не размислувам за враќање во Реал Мадрид, дојдов тука да го бранам дресот на Наполи. Не можев да зборувам со Анчелоти кога си заминував и еве сега сум тука. Немавме време да зборуваме, но сега тоа и не е така важно.

– Моја инспирација е Серхио Рамос, на теренот, но и надвор од него. Можам да се адаптирам на секоја страна во одбраната и сакам само да му помогнам на тимот. Во Реал Мадрид научив многу, научив дека резултатите не доѓаат на среќа, туку со многу работа и труд, – изјави Рафа Марин.