Нов болен пораз за Србинот: Ѓоковиќ загуби од 85. светски тенисер во Индијан Велс (ВИДЕО)

Поранешниот светски рекет број еден, Новак Ѓоковиќ доживеа експресна елиминација на Мастерсот во Индијан Велс.

Ѓоковиќ кој ја имаше улогата на шест носител претрпе пораз од 85. на АТП листата, Ботик Ван Де Заншлуп со 2-1 во сетови. Фаворитот не беше на посакуваното ниво, покажа доста слабости, имаше многу амплитуди во играта и на крајот претрпе пораз од 6:2, 3:6 и 6:1.

Мечот траеше два часа и истиот само потврди дека големиот грен слем шампион не е во форма, ритам затоа што ова беше трет пораз во низа, нешто што за првпат му се случува од 2018 година.

Се започна во Мелбурн каде поради повреда му се предаде на Александер Зверев, потоа неочекувано беше надигран од Матео Беретини во Доха, а сега и од тенисер кој во ждребот влезе како „лаки лузер“ (среќен губитник). Холанѓанецот во првата рунда го мина Ник Кирјос за да сега му се отвори патот и во третата рунда се соочи со Франсиско Серундоло.